తెలంగాణలో మరో మూడు రోజులపాటు భారీ వర్షాలు.. పలు జిల్లాలకు హెచ్చరికలు
హైదరాబాద్: రాష్ట్రంలో నైరుతి రుతుపవనాలు మరింత బలపడటంతో రానున్న 24 నుంచి 72 గంటల్లో తెలంగాణ వ్యాప్తంగా విస్తారంగా వర్షాలు కురిసే అవకాశం ఉందని భారత వాతావరణ శాఖ (ఐఎండీ) వెల్లడించింది. పలు జిల్లాల్లో భారీ నుంచి అతి భారీ వర్షాలు కురిసే అవకాశముందని అధికారులు హెచ్చరించారు.
వాతావరణ శాఖ అంచనా ప్రకారం, బంగాళాఖాతంలో వరుసగా ఏర్పడుతున్న అల్పపీడన వ్యవస్థల ప్రభావంతో జూలై 1 నుంచి 4 వరకు రాష్ట్రంలో వర్షాల తీవ్రత మరింత పెరగనుంది. ఆదిలాబాద్, కుమురంభీం ఆసిఫాబాద్, మంచిర్యాల, నిర్మల్, కరీంనగర్, పెద్దపల్లి, జయశంకర్ భూపాలపల్లి, మహబూబాబాద్, వరంగల్, హనుమకొండ తదితర జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని ఐఎండీ తెలిపింది.
ఇక జూన్ నెలలో రాష్ట్రవ్యాప్తంగా సాధారణ వర్షపాతంతో పోలిస్తే సుమారు 12 శాతం లోటు నమోదైనట్లు వాతావరణ శాఖ వెల్లడించింది. హనుమకొండ జిల్లాలో అత్యధిక వర్షాభావం నమోదుకాగా, రాష్ట్రంలోని 16 జిల్లాల్లో సాధారణం కంటే తక్కువ వర్షపాతం నమోదైనట్లు అధికారులు తెలిపారు.
భారీ వర్షాల నేపథ్యంలో ప్రజలు అప్రమత్తంగా ఉండాలని, లోతట్టు ప్రాంతాల ప్రజలు అవసరమైతే జాగ్రత్తలు తీసుకోవాలని అధికారులు సూచించారు. ఉరుములు, మెరుపులు సంభవించే సమయంలో చెట్ల కింద నిలబడకుండా, అవసరమైతే మాత్రమే బయటకు వెళ్లాలని వాతావరణ శాఖ హెచ్చరించింది.