ఆడబిడ్డ పుడితే ‘ఐదు వేల’ ఫిక్స్డ్ డిపాజిట్: మాట నిలబెట్టుకున్న కౌన్సిలర్ చెలిమెల రాములు!
తూప్రాన్ మున్సిపాలిటీలో అరుదైన దృశ్యం.. ఎన్నికల వాగ్దానాన్ని నెరవేర్చిన 13వ వార్డు కౌన్సిలర్.. మున్సిపల్ కమిషనర్ సమక్షంలో లబ్ధిదారులకు బాండ్ అందజేత!
తూప్రాన్ జూన్ 8 (ఆశ్వి అప్డేట్స్ )
రాజకీయాల్లో ఇచ్చిన మాటను నిలబెట్టుకునే నాయకులు అరుదుగా ఉంటారు. కానీ, తాను ఇచ్చిన హామీని గుండెల్లో పెట్టుకొని, ఆడబిడ్డల భవిష్యత్తుకు భరోసానిస్తూ తూప్రాన్ మున్సిపాలిటీ 13వ వార్డు కౌన్సిలర్ చెలిమెల రాములు ఒక గొప్ప కార్యక్రమానికి శ్రీకారం చుట్టారు. తన వార్డులో ఏ దంపతులకైనా ఆడబిడ్డ జన్మిస్తే.. ఆ పాప పేరిట తన సొంత డబ్బుల నుండి 5,000 వేల రూపాయలు ఫిక్స్డ్ డిపాజిట్ ఎన్నికల సమయంలో ఆయన ఓటర్లకు మాట ఇచ్చారు.నేడు ఆ మాటను అక్షరాలా నిజం చేసి చూపిస్తూ, వార్డు ప్రజల హృదయాలను గెలుచుకున్నారు.
మమత – భాస్కర్ దంపతులకు రూ. 5000 పోస్టల్ బాండ్!
13వ వార్డుకు చెందిన కారంగుల మమత – భాస్కర్ దంపతులకు ఇటీవల ఆడబిడ్డ జన్మించింది. ఈ విషయం తెలుసుకున్న కౌన్సిలర్ చెలిమెల రాములు తాను ఎన్నికల ముందు ఇచ్చిన మాట ప్రకారం వెంటనే స్పందించారు. ఆ పాప భవిష్యత్తు కోసం రూ. 5,000 విలువైన పోస్టల్ ఫిక్స్డ్ డిపాజిట్ బాండ్ను సిద్ధం చేయించారు.సోమవారం తూప్రాన్ మున్సిపాలిటీలో 4, 9, 10, 13 వార్డులకు సంబంధించి నిర్వహించిన అధికారిక వార్డు సభల వేదికగా, మున్సిపల్ కమిషనర్ రమేష్ కుమార్ సమక్షంలో ఆ పోస్టల్ డిపాజిట్ బాండ్ను ఆ దంపతులకు అత్యంత ఘనంగా అందజేశారు.
‘రాములన్న’ సేవలకు వార్డు ప్రజల జేజేలు!
ఆడపిల్లల చదువుకు, భవిష్యత్తుకు భరోసా ఇచ్చేలా కౌన్సిలర్ రాములు తీసుకున్న ఈ నిర్ణయంపై మున్సిపల్ కమిషనర్తో పాటు తోటి ప్రజాప్రతినిధులు ప్రశంసల వర్షం కురిపించారు.రాజకీయాలకతీతంగా, కేవలం ప్రజలకు సేవ చేయాలనే తపనతో, ఆడబిడ్డలను మహాలక్ష్మిగా భావించి రాములు చేస్తున్న ఈ సేవలు అందరికీ ఆదర్శప్రాయం. ఎన్నికల హామీలను అటకెక్కించే ఈ రోజుల్లో.. ఇచ్చిన మాట కోసం సొంత నిధులు వెచ్చించడం ఆయన నిబద్ధతకు నిదర్శనం అని స్థానిక ప్రజలు హర్షం వ్యక్తం చేస్తున్నారు.
ప్రస్తుతం తూప్రాన్ మున్సిపాలిటీలో కౌన్సిలర్ చెలిమెల రాములు చేస్తున్న సేవలు, ఆయన మానవతా దృక్పథంపై సర్వత్రా ప్రశంసలు వ్యక్తమవుతున్నాయి.