పారిస్లో రాజమౌళికి అరుదైన గౌరవం.. చారిత్రక సినీ సంస్థలో శాశ్వత సీటు
హైదరాబాద్: భారతీయ సినిమాను ప్రపంచ స్థాయికి తీసుకెళ్లిన ప్రముఖ దర్శకుడు ఎస్.ఎస్. రాజమౌళికి ఫ్రాన్స్లో అరుదైన అంతర్జాతీయ గౌరవం లభించింది. ప్రస్తుతం పారిస్ పర్యటనలో ఉన్న ఆయనను ప్రముఖ సినీ సంస్థ సినెమాథెక్ ఫ్రాన్సైస్ ఘనంగా సత్కరించింది. ఈ సందర్భంగా పారిస్లోని చారిత్రక హెన్రీ లాంగ్లోయిస్ హాల్లో రాజమౌళి పేరుతో శాశ్వత సీటును ఏర్పాటు చేయడం విశేషంగా నిలిచింది.
ప్రపంచ సినీ చరిత్రలో విశిష్ట స్థానం కలిగిన ఈ సంస్థలో ఇలాంటి గుర్తింపు దక్కడం అత్యంత అరుదైన గౌరవంగా భావిస్తారు. ఫ్రెంచ్ దిగ్గజ దర్శకుడు, ఆస్కార్ అవార్డు గ్రహీత కోస్టా గావ్రాస్ సమక్షంలో రాజమౌళికి ఈ సత్కారం అందజేశారు. అలాగే ఆయన తెరకెక్కించిన పలు చిత్రాలను ప్రత్యేకంగా ప్రదర్శించి నివాళులర్పించారు.
ఈ గౌరవంపై స్పందించిన రాజమౌళి, పారిస్లో తన సినిమాలు ప్రదర్శించడమే గొప్ప అనుభూతి అనుకుంటే, తన పేరుతో శాశ్వత సీటు ఏర్పాటు చేయడం జీవితంలో మరపురాని ఘట్టమని తెలిపారు. భారతీయ సినిమాకు ఈ గౌరవం దక్కడం ఆనందంగా ఉందని, తనపై ప్రేమాభిమానాలు చూపిన సినెమాథెక్ ఫ్రాన్సైస్ బృందానికి కృతజ్ఞతలు తెలిపారు.
‘బాహుబలి’, ‘ఆర్ఆర్ఆర్’ వంటి చిత్రాలతో ప్రపంచవ్యాప్తంగా గుర్తింపు పొందిన రాజమౌళికి లభించిన ఈ గౌరవం తెలుగు సినీ పరిశ్రమకే గర్వకారణమని సినీ వర్గాలు అభిప్రాయపడుతున్నాయి.